ᠮᠣᠩᠭᠤᠯ ᠦᠰᠦᠭ ᠤᠨ ᠺᠣᠳ᠋ᠯᠠᠯ ᠤᠨ ᠲᠤᠬᠠᠢ - ᠡᠷᠬᠢᠮ .txt

ᠮᠣᠩᠭᠤᠯ ᠦᠰᠦᠭ ᠤᠨ unicode ᠶᠢᠨ ᠲᠤᠬᠠᠢ ᠡᠷᠬᠢᠮ ᠮᠣᠩᠭᠤᠯ ᠦᠰᠦᠭ ᠪᠢᠴᠢᠭ ᠤᠨ ᠢᠶᠠᠨ ᠰᠢᠳᠤᠷᠭᠤ ᠬᠡᠷᠡᠭᠯᠡᠭᠴᠢ ᠪᠣᠯᠣᠭᠰᠠᠨ ᠤ ᠬᠤᠪᠢ ᠲᠤ᠂ ᠴᠠᠬᠢᠮ ᠣᠷᠴᠢᠨ ᠲᠤ ᠰᠠᠮᠠᠭᠤᠷᠠᠯ ᠬᠤᠳᠬᠤᠷᠠᠯ ᠦᠭᠡᠢ ᠪᠠᠷ ᠮᠣᠩᠭᠤᠯ ᠦᠰᠦᠭ ᠢᠶᠠᠨ ᠵᠠᠷᠤᠬᠤ᠂ ᠰᠤᠷᠠᠭ ᠵᠠᠩᠭᠢ ᠪᠠᠨ ᠬᠤᠳᠬᠤᠷᠠᠯ ᠰᠠᠮᠠᠭᠤᠷᠠᠯ ᠦᠭᠡᠢ ᠪᠠᠷ ᠰᠣᠯᠢᠯᠴᠠᠬᠤ ᠶᠢ ᠯᠠ ᠬᠦᠰᠡᠭᠡᠳ ᠢᠷᠡᠭᠰᠡᠨ᠂ ᠳᠡᠯᠡᠬᠡᠢ ᠶᠢᠨ ᠪᠤᠰᠤᠳ ᠤᠯᠤᠰ ᠦᠨᠳᠥᠰᠦᠲᠡᠨ ᠪᠠᠷᠤᠭ ᠪᠦᠷ ᠪᠡᠶᠡᠯᠡᠭᠦᠯᠴᠢᠬᠡᠭᠰᠡᠨ ᠡᠨᠡ ᠬᠦ ᠬᠠᠮᠤᠭ ᠨᠠᠭᠠᠳᠤ ᠵᠠᠬ᠎ᠠ ᠶᠢᠨ ᠱᠠᠭᠠᠷᠳᠠᠯᠭ᠎ᠠ ᠶᠢ ᠮᠢᠨᠢ ᠴᠦ ᠬᠠᠩᠭᠠᠵᠤ ᠳᠡᠶᠢᠯᠬᠦ ᠦᠭᠡᠢ ᠪᠠᠶᠢᠭᠠᠳ ᠪᠠᠶᠢᠳᠠᠭ ᠲᠤᠨᠢ ᠪᠢ ᠶᠡᠭᠡ ᠭᠤᠮᠣᠳᠠᠵᠤ ᠪᠠᠶᠢᠭ᠎ᠠ︕ ᠮᠣᠩᠭᠤᠯ ᠦᠰᠦᠭ ᠢᠶᠠᠨ ᠴᠠᠬᠢᠮ ᠣᠷᠴᠢᠨ ᠲᠤ ᠰᠣᠯᠢᠶᠠᠷᠠᠯ ᠰᠠᠮᠠᠭᠤᠷᠠᠯ ᠦᠭᠡᠢ ᠪᠠᠷ ᠵᠠᠷᠤᠬᠤ ᠯᠠ ᠶᠤᠮ ᠰᠠᠨ︕ ᠡᠨᠡ ᠱᠠᠭᠠᠷᠳᠠᠯᠭ᠎ᠠ ᠬᠡᠲᠦᠷᠡᠭᠰᠡᠨ ᠦᠭᠡᠢ ᠪᠢᠵᠡ⁈ ᠥᠯᠥ᠄ ︵t︶ {olo} [ol] ᠬᠥᠬᠡᠪᠲᠦᠷ ᠴᠠᠶᠢᠪᠤᠷ ᠥᠩᠭᠡ ᠶᠢ ᠢᠯᠡᠳᠬᠡᠭᠰᠡᠨ ᠲᠡᠮᠳᠡᠭ ᠦᠭᠡ ᠶᠢ ᠲᠡᠮᠳᠡᠭᠯᠡᠭᠰᠡᠨ ᠦᠰᠦᠭ᠃ ᠦᠯᠦ᠄ ︵s︶ {ulu} [ul] ᠲᠤᠬᠠᠢ ᠶᠢᠨ ᠦᠢᠯᠡ ᠶᠢ ᠦᠭᠡᠶᠢᠰᠬᠡᠬᠦ ᠤᠳᠬ᠎ᠠ ᠲᠠᠢ ᠰᠤᠯᠠ ᠦᠭᠡ ᠶᠢ ᠲᠡᠮᠳᠡᠭᠯᠡᠭᠰᠡᠨ ᠦᠰᠦᠭ᠃ ︽ᠥᠯᠥ᠂ ᠦᠯᠦ︾ ᠭᠡᠰᠡᠨ ᠬᠤᠶᠠᠷ ᠦᠰᠦᠭ ᠢ ᠳᠠᠩ ᠢᠶᠠᠷ ᠨᠢ ᠪᠢᠴᠢᠭᠰᠡᠨ ᠪᠠᠶᠢᠬᠤ ᠦᠶᠡᠰ᠂ ᠠᠯᠢ ᠨᠢ ᠶᠠᠮᠠᠷ ᠤᠩᠰᠢᠯᠭ᠎ᠠ ᠲᠠᠢ ᠭᠡᠭᠴᠢ ᠶᠢ ᠬᠡᠨ ᠮᠡᠳᠡᠨ᠎ᠡ︖ ᠰᠢᠷᠢᠯᠳᠥᠭᠰᠡᠨ ᠣᠯᠣᠰᠣ ᠰᠢᠭ᠋ ᠮᠣᠩᠭᠤᠯ ᠦᠰᠦᠭ ᠤᠨ ᠺᠣᠳ᠋ᠯᠠᠯ ᠤᠨ ᠰᠠᠮᠠᠭᠤᠨ ᠪᠠᠶᠢᠳᠠᠯ ᠢ ᠵᠦᠭᠰᠢᠷᠡᠭᠦᠯᠬᠦ ᠪᠠᠷ ᠪᠢ ᠠᠷᠪᠠᠨ ᠵᠢᠯ ᠴᠢᠷᠮᠠᠶᠢᠯ᠎ᠠ᠃ ᠬᠥᠮᠥᠰ ᠮᠣᠩᠭᠤᠯ ᠦᠰᠦᠭ ᠢᠶᠠᠨ ᠪᠤᠷᠤᠭᠤ ᠺᠣᠳ᠋ ᠲᠠᠢ ᠪᠢᠴᠢᠬᠦ ᠠᠴᠠ ᠡᠮᠢᠶᠡᠵᠦ᠂ ᠠᠷᠤ ᠳᠤᠨᠢ ᠲᠠᠶᠢᠯᠪᠤᠷᠢ ᠬᠠᠳᠠᠯ᠎ᠠ᠂ ᠤᠩᠰᠢᠯᠭ᠎ᠠ ᠶᠢ ᠨᠢ ᠬᠠᠳᠠᠯ᠎ᠠ᠂ ᠣᠷᠴᠢᠭᠤᠯᠭ᠎ᠠ ᠶᠢ ᠨᠢ ᠴᠤ ᠬᠠᠳᠠᠯ᠎ᠠ᠂ ᠭᠡᠪᠡᠴᠦ ᠬᠥᠮᠥᠰ ᠦᠰᠦᠭ ᠢᠶᠠᠨ ᠯᠡ ᠠᠩᠬᠠᠷᠬᠤ ᠠᠴᠠ ᠪᠢᠰᠢ ᠪᠤᠰᠤᠳ ᠢ ᠨᠢ ᠠᠩᠬᠠᠷᠬᠤ ᠦᠭᠡᠢ ᠪᠠᠶᠢᠭᠠᠳ ᠪᠠᠶᠢᠬᠤ ᠶᠢ ᠶᠠᠭᠠᠬᠢᠨ᠎ᠠ⁈ ᠠᠷᠭ᠎ᠠ ᠠᠯᠳᠠᠷᠠᠬᠤ ᠲᠠᠭᠠᠨ ᠪᠢ ᠥᠪᠡᠷ ᠤᠨ ᠦᠰᠦᠭ ᠰᠢᠪᠡᠬᠦ ᠪᠠᠭᠠᠵᠢ ᠲᠠᠭᠠᠨ ᠪᠠᠰᠠ ᠬᠤᠯᠪᠣᠭ᠎ᠠ ᠦᠰᠦᠭ ᠢ ᠨᠢ ᠴᠦ ᠣᠷᠣᠭᠤᠯᠤᠯ᠎ᠠ᠂ ᠠᠪᠢᠶᠠᠴᠢᠯᠠᠭ᠎ᠠ ᠶᠢᠨ ᠶᠣᠰᠣᠭᠠᠷ ᠲᠡᠶᠢᠨ ᠢᠯᠭᠠᠯ ᠤᠨ ︽ᠤᠨ᠂ ᠦᠨ ︵ᠴᠢᠩᠭ᠎ᠠ᠂ ᠬᠥᠨᠳᠡᠢ︶︾ ᠳᠠᠭᠠᠪᠤᠷᠢ ᠶᠢ ᠴᠤ ᠰᠠᠶᠢᠬᠠᠨ ᠢᠯᠭᠠᠵᠤ ᠲᠠᠯᠪᠢᠯ᠎ᠠ᠂ ᠬᠥᠮᠥᠰ ᠮᠥᠨ ᠬᠠᠮᠢᠶᠠᠷᠬᠤ ᠦᠭᠡᠢ᠂ ᠳᠠᠳᠤᠭᠰᠠᠨ ᠶᠣᠰᠣᠭᠠᠷ ᠨᠢᠭᠡ ᠶᠢ ᠨᠢ ᠯᠠ ᠵᠠᠷᠤᠨ᠎ᠠ᠂ ᠬᠥᠮᠥᠰ ᠤᠨ ᠲᠠᠷᠢᠬᠢᠨ ᠲᠤ ᠪᠦᠷ ᠨᠢᠭᠡᠳᠥᠯᠲᠡᠢ ᠪᠢᠴᠢᠭᠦᠯᠬᠦ ᠬᠤᠷᠠᠮᠠᠯ ᠲᠣᠨᠤᠭ ᠤᠭᠰᠠᠷᠠᠭᠠᠳ ᠲᠠᠯᠪᠢᠴᠢᠬᠠᠪᠠᠯ ᠠᠮᠠᠷᠬᠠᠨ ᠴᠤ ᠶᠤᠮ ᠦᠦ︖ ᠪᠢ ᠴᠦ ᠳᠥᠭᠦᠮ ᠢᠶᠠᠨ ᠪᠣᠳᠣᠭᠠᠳ ᠦᠷᠭᠦᠯᠵᠢ ᠳᠠᠳᠤᠭᠰᠠᠨ ᠶᠣᠰᠣᠭᠠᠷ ᠪᠤᠷᠤᠭᠤ ᠪᠠᠷ ᠰᠢᠪᠡᠳᠡᠭ ᠢᠶᠠᠨ ᠠᠳᠡ ᠨᠢᠭᠤᠬᠤ ᠦᠭᠡᠢ᠃ ᠮᠣᠩᠭᠤᠯ ᠦᠰᠦᠭ ᠢ ᠴᠠᠬᠢᠮ ᠣᠷᠴᠢᠨ ᠲᠤ ᠰᠠᠮᠠᠭᠤᠷᠠᠯ ᠦᠭᠡᠢ ᠪᠠᠷ ᠵᠠᠷᠤᠬᠤ ᠲᠤ ᠵᠠᠪᠠᠯ ᠨᠢᠭᠡ ᠳᠦᠷᠰᠦ ᠶᠢᠨ ᠦᠰᠦᠭ ᠲᠤ ᠵᠥᠪᠬᠡᠨ ᠨᠢᠭᠡ ᠯᠡ ᠺᠣᠳ᠋ ᠤᠨ ᠴᠥᠷᠬᠡᠯᠡᠭᠡ ᠲᠠᠢ ᠪᠠᠶᠢᠯᠭᠠᠬᠤ ᠬᠡᠷᠡᠭᠲᠡᠢ᠂ ᠬᠥᠮᠥᠰ ᠤᠨ ᠪᠢᠴᠢᠭᠰᠡᠨ ᠦᠰᠦᠭ ᠤᠨ ᠵᠥᠪ ᠪᠤᠷᠤᠭᠤ ᠶᠢ ᠮᠠᠭᠠᠳᠯᠠᠬᠤ ᠲᠤ ᠺᠣᠳ᠋ ᠢᠶᠠᠷ ᠪᠠᠷᠢᠮᠵᠢᠶᠠᠯᠠᠬᠤ ᠶᠢᠨ ᠠᠷᠭ᠎ᠠ ᠦᠭᠡᠢ᠂ ᠬᠠᠷᠢᠨ ᠦᠰᠦᠭ ᠤᠨ ᠳᠦᠷᠰᠦ ᠪᠠᠷ ᠯᠡ ᠪᠠᠷᠢᠮᠵᠢᠶᠠᠯᠠᠬᠤ ᠨᠢ ᠵᠥᠪ᠃ ᠡᠨᠡ ᠪᠣᠯ ᠬᠥᠮᠥᠨ ᠤ ᠲᠠᠷᠢᠬᠢᠨ ᠤ ᠰᠡᠳᠬᠢᠴᠡ ᠶᠢᠨ ᠦᠨᠳᠥᠰᠦᠨ ᠵᠢᠮ᠎ᠡ ᠶᠣᠰᠣ ᠪᠠᠶᠢᠭ᠎ᠠ᠃ ᠡᠨᠡ ᠵᠢᠮ᠎ᠡ ᠶᠣᠰᠣ ᠪᠠᠷ ᠯᠠ ᠪᠢᠳᠡ ᠠᠵᠢᠯ ᠢᠶᠠᠨ ᠥᠷᠨᠢᠭᠦᠯᠪᠡᠯ ᠵᠣᠬᠢᠨ᠎ᠠ ᠭᠡᠰᠡᠨ ᠢ ᠪᠢ ᠦᠢᠯᠡᠳᠥᠯᠭᠡ ᠳᠤᠮᠳᠠ ᠪᠠᠨ ᠤᠯᠠᠮ ᠢᠶᠠᠷ ᠰᠡᠷᠡᠵᠦ ᠣᠶᠢᠯᠠᠭᠠᠯ᠎ᠠ᠃ ᠣᠳᠣᠬᠠᠨ ᠲᠤ᠂ ᠬᠠᠮᠲᠤ ᠶᠢᠨ ᠳᠦᠷᠢᠮᠵᠢᠯ ᠨᠢᠭᠡᠳᠥᠯ ᠢᠶᠠᠷ ᠺᠣᠳ᠋ ᠤᠨ ᠳᠤᠲᠠᠭᠳᠠᠯ ᠢᠶᠠᠨ ᠨᠥᠬᠦᠪᠥᠷᠢᠯᠡᠨ᠎ᠡ ᠭᠡᠰᠡᠨ ᠪᠣᠳᠣᠯ ᠲᠠᠢ ᠬᠥᠮᠥᠰ ᠣᠯᠠᠨ ᠪᠠᠶᠢᠭ᠎ᠠ᠃ ᠡᠶᠢᠮᠦ ᠠᠷᠭ᠎ᠠ ᠶᠢ ᠪᠢ ᠠᠷᠪᠠᠨ ᠵᠢᠯ ᠤᠨ ᠡᠮᠦᠨ᠎ᠡ ᠠᠴᠠ ᠪᠣᠳᠣᠵᠤ ᠰᠡᠳᠥᠵᠦ ᠪᠠᠶᠢᠭᠰᠠᠨ ᠪᠥᠭᠡᠳ ᠡᠨᠡ ᠲᠠᠯ᠎ᠠ ᠪᠠᠷ ᠶᠡᠬᠡᠬᠡᠨ ᠴᠢᠷᠮᠠᠶᠢᠯᠭ᠎ᠠ ᠭᠠᠷᠭᠠᠯ᠎ᠠ᠂ ᠬᠠᠰᠴᠣᠭᠲᠤ ᠭᠡᠭᠴᠢ ᠵᠠᠯᠠᠭᠤ ᠪᠠᠭᠰᠢ ᠯᠤᠭ᠎ᠠ ᠬᠡᠳᠥᠨ ᠵᠢᠯ ᠤᠨ ᠡᠮᠦᠨ᠎ᠡ ᠵᠣᠭᠤᠭᠳᠠᠬᠤ ᠳᠤᠮᠳᠠ᠂ ᠮᠣᠩᠭᠤᠯ ᠦᠰᠦᠭ ᠤᠨ ᠺᠣᠳ᠋ᠯᠠᠯ ᠤᠨ ᠰᠠᠮᠠᠭᠤᠷᠠᠯ ᠢ ᠵᠠᠰᠠᠬᠤ ᠲᠤ ᠨᠢᠭᠡ ᠪᠠᠷᠢᠮᠵᠢᠶ᠎ᠠ ᠦᠰᠦᠭ ᠤᠨ ᠬᠥᠮᠥᠷᠭᠡ ᠭᠠᠷᠭᠠᠭᠠᠳ᠂ ᠳᠠᠶᠠᠭᠠᠷ ᠢᠶᠠᠨ ᠪᠦᠷ ᠡᠭᠦᠨ ᠢᠶᠠᠷ ᠪᠠᠷᠢᠮᠵᠢᠶᠠᠵᠢᠭᠤᠯᠤᠨ ᠪᠠᠷᠢᠮᠲᠠᠯᠠᠵᠤ ᠬᠡᠷᠡᠭᠯᠡᠪᠡᠯ ᠪᠦᠷ ᠨᠢᠭᠡᠳᠥᠯᠲᠡᠢ ᠪᠣᠯᠴᠢᠬᠠᠨ᠎ᠠ ᠭᠡᠵᠦ ᠪᠠᠶᠢᠭᠰᠠᠨ᠃ ᠭᠡᠪᠡᠴᠦ ᠴᠢᠷᠮᠠᠶᠢᠬᠤ ᠲᠤᠲᠤᠮ ᠡᠨᠡ ᠨᠢ ᠠᠪᠤᠰᠢᠲᠠᠢ ᠠᠷᠭ᠎ᠠ ᠪᠢᠰᠢ ᠭᠡᠰᠡᠨ ᠢ ᠲᠣᠳᠣ ᠣᠶᠢᠯᠠᠭᠠᠬᠤ ᠪᠣᠯᠵᠠᠢ᠃ ᠺᠣᠳ᠋ ᠢ ᠲᠡᠭᠦᠯᠳᠡᠷ ᠰᠠᠶᠢᠨ ᠲᠣᠬᠢᠷᠠᠭᠤᠯᠬᠤ ᠦᠭᠡᠢ ᠪᠣᠯ ᠦᠰᠦᠭ ᠤᠨ ᠺᠣᠳ᠋ᠯᠠᠯ ᠤᠨ ᠰᠠᠮᠠᠭᠤᠷᠠᠯ ᠡᠭᠦᠰᠬᠦ ᠶᠢ ᠶᠠᠮᠠᠷ ᠴᠤ ᠠᠷᠭ᠎ᠠ ᠪᠠᠷ ᠦᠭᠡᠶᠢᠰᠬᠡᠵᠦ ᠳᠡᠶᠢᠯᠦᠰᠢ ᠦᠭᠡᠢ ᠭᠡᠰᠡᠨ ᠢ ᠬᠡᠴᠢᠨᠡᠨ ᠵᠢᠯ ᠤᠨ ᠰᠦᠪᠡᠭᠴᠢᠯᠡᠯ ᠢᠶᠠᠷ ᠣᠯᠵᠤ ᠮᠡᠳᠡᠭᠰᠡᠨ ᠪᠥᠭᠡᠳ ᠡᠨᠡ ᠠᠰᠠᠭᠤᠳᠠᠯ ᠢ ᠡᠷᠲᠡ ᠨᠢᠭᠡ ᠡᠳᠥᠷ ᠰᠢᠢᠳᠪᠦᠷᠢᠯᠡᠬᠦ ᠦᠭᠡᠢ ᠪᠣᠯ ᠮᠣᠩᠭᠤᠯ ᠰᠣᠶᠣᠯ ᠲᠤ ᠪᠤᠴᠠᠭᠠᠵᠤ ᠴᠢᠳᠠᠰᠢ ᠦᠭᠡᠢ ᠬᠤᠬᠢᠷᠠᠯ ᠢ ᠠᠪᠴᠢᠷᠠᠬᠤ ᠪᠣᠯᠣᠨ᠎ᠠ ᠭᠡᠰᠡᠨ ᠢ ᠲᠣᠳᠣ ᠣᠶᠢᠯᠠᠭᠠᠬᠤ ᠪᠣᠯᠵᠠᠢ᠃ ᠺᠣᠮᠫᠢᠦ᠋ᠲ᠋ᠧᠷ ᠲᠤ ᠦᠰᠦᠭ ᠰᠢᠪᠡᠬᠦ ᠨᠢ ᠶᠠᠭ ᠯᠠ ᠴᠠᠭᠠᠰᠤᠨ ᠳᠡᠭᠡᠷ᠎ᠡ ᠦᠰᠦᠭ ᠪᠢᠴᠢᠵᠦ ᠪᠠᠶᠢᠭ᠎ᠠ ᠲᠠᠢ ᠠᠳᠠᠯᠢ᠂ ᠠᠴᠤᠭ ᠠᠷᠠᠭ᠎ᠠ ᠭᠡᠳᠡᠰᠦ ᠴᠠᠴᠤᠯᠭ᠎ᠠ ᠣᠷᠬᠢᠴᠠ ᠁ ᠭᠡᠬᠦ ᠮᠡᠲᠦ ᠪᠢᠴᠢᠯᠭᠡ ᠶᠢᠨ ᠡᠯᠧᠮᠧᠨ᠋ᠲ ᠢ ᠯᠠ ᠪᠣᠳᠣᠯᠬᠢᠯᠠᠳᠠᠭ ᠠᠴᠠ ᠪᠢᠰᠢ ᠳᠠᠭᠤᠳᠠᠯᠭ᠎ᠠ ᠠᠪᠢᠶᠠᠯᠠᠭ᠎ᠠ ᠶᠢ ᠶᠠᠷᠢᠳᠠᠭ ᠦᠭᠡᠢ᠂ ᠵᠥᠪᠬᠡᠨ ᠤᠩᠰᠢᠭᠴᠢ ᠠᠴᠠ ᠪᠢᠴᠢᠭᠰᠡᠨ ᠦᠰᠦᠭ ᠢ ᠲᠤᠷᠰᠢᠯᠭ᠎ᠠ ᠮᠡᠳᠡᠯᠭᠡ ᠲᠡᠭᠡᠨ ᠲᠦᠰᠢᠭᠯᠡᠨ ᠤᠩᠰᠢᠳᠠᠭ᠂ ᠲᠡᠷᠡᠴᠢᠯᠡᠨ ᠤᠩᠰᠢᠯᠭ᠎ᠠ ᠨᠢ ᠨᠡᠶᠢᠭᠡᠮ ᠤᠨ ᠬᠥᠭᠵᠢᠯᠲᠡ᠂ ᠲᠡᠦᠬᠡ ᠶᠢᠨ ᠤᠷᠤᠰᠬᠠᠯ ᠢ ᠳᠠᠭᠠᠵᠤ ᠬᠤᠪᠢᠷᠠᠵᠤ ᠬᠥᠭᠵᠢᠵᠦ ᠯᠠ ᠪᠠᠶᠢᠳᠠᠭ᠃ ᠮᠣᠩᠭᠤᠯ ᠦᠰᠦᠭ ᠤᠨ ᠺᠣᠳ᠋ᠯᠠᠯ ᠪᠣᠯ ᠨᠢᠭᠡᠳᠥᠭᠡᠷ ᠳᠠᠪᠬᠤᠷᠭ᠎ᠠ᠂ ᠰᠠᠭᠤᠷᠢ ᠳᠠᠪᠬᠤᠷᠭ᠎ᠠ᠂ ᠡᠭᠦᠨ ᠤ ᠳᠡᠭᠡᠷ᠎ᠡ ᠳᠠᠪᠬᠤᠷᠭ᠎ᠠ ᠪᠣᠯ ᠦᠰᠦᠭ ᠰᠢᠪᠡᠬᠦ ᠪᠠᠭᠠᠵᠢ ᠮᠡᠲᠦ ᠶᠢᠨ ᠵᠦᠢᠯᠡᠰ᠂ ᠡᠭᠦᠨ ᠤ ᠳᠡᠭᠡᠷ᠎ᠡ ᠳᠠᠪᠬᠤᠷᠭ᠎ᠠ ᠪᠣᠯ ᠰᠠᠶ᠋ᠢ ᠠᠪᠢᠶ᠎ᠠ ᠵᠦᠢ ᠶᠢᠨ ᠰᠤᠳᠤᠯᠭᠠᠨ ᠵᠢᠴᠢ ᠴᠠᠬᠢᠮ ᠤᠩᠰᠢᠯᠭ᠎ᠠ ᠪᠢᠴᠢᠯᠭᠡ ᠶᠢᠨ ᠰᠢᠰᠲ᠋ᠧᠮ ᠪᠤᠶᠤ᠃ ᠣᠳᠣᠬᠠᠨ ᠲᠤ ᠡᠳᠡᠭᠡᠷ ᠢ ᠪᠦᠷ ᠨᠢᠭᠡ ᠳᠠᠪᠬᠤᠷᠭ᠎ᠠ ᠲᠤ ᠬᠤᠯᠢᠶᠠᠨ ᠪᠠᠨᠲᠠᠩ ᠢ ᠨᠢ ᠬᠤᠳᠬᠤᠭᠠᠳ ᠯᠠ ᠰᠠᠭᠤᠵᠤ ᠪᠠᠶᠢᠭ᠎ᠠ᠂ ᠢᠩᠭᠢᠭᠡᠳ ᠪᠢᠳᠡ ᠬᠡᠵᠢᠶᠡᠳᠡ ᠴᠦ ᠵᠦᠭ ᠭᠠᠷᠭᠠᠵᠤ ᠳᠡᠶᠢᠯᠬᠦ ᠦᠭᠡᠢ᠂ ᠵᠠᠪᠠᠯ ᠰᠢᠰᠲ᠋ᠧᠮᠲᠦ ᠢᠨᠵᠧᠨᠧᠷᠢᠩ ᠤᠨ ᠰᠡᠳᠬᠢᠴᠡ ᠪᠠᠷ ᠵᠦᠢᠲᠡᠢ ᠰᠠᠶᠢᠬᠠᠨ ᠵᠣᠬᠢᠶᠠᠨ ᠪᠠᠶᠢᠭᠤᠯᠵᠤ᠂ ᠰᠢᠨᠵᠢᠯᠡᠬᠦ ᠤᠬᠠᠭᠠᠨᠴᠢ ᠣᠪᠣᠷ ᠢᠶᠠᠷ᠂ ᠵᠦᠢ ᠵᠣᠬᠢᠰᠲᠠᠢ ᠰᠠᠯᠭᠠᠵᠤ᠂ ᠳᠠᠪᠬᠤᠷᠭ᠎ᠠ ᠬᠤᠪᠢᠶᠠᠵᠤ ᠰᠤᠳᠤᠯᠤᠨ ᠰᠢᠢᠳᠪᠦᠷᠢᠯᠡᠬᠦ ᠴᠢᠬᠤᠯᠠᠲᠠᠢ᠃ ᠠᠳᠠᠯᠢ ᠪᠤᠰᠤ ᠰᠤᠳᠤᠯᠭᠠᠨ ᠤ ᠳᠠᠪᠬᠤᠷᠭ᠎ᠠ ᠲᠤ ᠠᠳᠠᠯᠢ ᠪᠤᠰᠤ ᠶᠢᠨ ᠱᠠᠭᠠᠷᠳᠠᠯᠭ᠎ᠠ ᠲᠠᠢ ᠪᠠᠶᠢᠳᠠᠭ ᠲᠤᠯᠠ ᠠᠳᠠᠯᠢ ᠪᠤᠰᠤ ᠶᠢᠨ ᠪᠠᠷᠢᠮᠵᠢᠶ᠎ᠠ ᠪᠠ ᠳᠦᠷᠢᠮᠵᠢᠯ ᠲᠠᠢ ᠪᠠᠶᠢᠳᠠᠭ᠃ ᠺᠣᠳ᠋ᠯᠠᠯ ᠨᠢ ᠶᠠᠮᠠᠷ ᠪᠠᠶᠢᠭᠰᠠᠨ ᠴᠤ ᠪᠣᠯᠲᠤᠭᠠᠢ᠂ ᠪᠢᠳᠡᠨ ᠲᠤ ᠬᠠᠷᠠᠭᠳᠠᠳᠠᠭ ᠨᠢ ᠮᠣᠩᠭᠤᠯ ᠦᠰᠦᠭ᠂ ᠺᠣᠳ᠋ ᠨᠢ ᠬᠠᠷᠠᠭᠳᠠᠳᠠᠭ ᠦᠭᠡᠢ᠃ ᠡᠶᠢᠮᠦ ᠠᠴᠠ ᠺᠣᠳ᠋ ᠵᠣᠬᠢᠶᠠᠭᠴᠢᠳ ᠵᠥᠪᠬᠡᠨ ᠳᠦᠷᠰᠦᠨ ᠦᠰᠦᠭ ᠪᠣᠯᠭᠠᠨ ᠲᠤ ᠨᠢᠭᠡ ᠺᠣᠳ᠋ ᠤᠨ ᠴᠥᠷᠬᠡᠯᠡᠭᠡ ᠲᠠᠢ ᠪᠠᠶᠢᠯᠭᠠᠬᠤ ᠵᠠᠷᠴᠢᠮ ᠢᠶᠠᠷ ᠯᠠ ᠠᠵᠢᠯᠯᠠᠪᠠᠯ ᠪᠣᠯᠴᠢᠬᠠᠨ᠎ᠠ᠂ ᠢᠯᠡᠷᠡᠵᠦ ᠪᠠᠶᠢᠭ᠎ᠠ ᠦᠰᠦᠭ ᠢ ᠶᠠᠭᠠᠬᠢᠵᠤ ᠤᠩᠰᠢᠬᠤ᠂ ᠶᠠᠮᠠᠷ ᠬᠡᠯᠡᠨ ᠵᠦᠢ ᠶᠢᠨ ᠵᠢᠮ᠎ᠡ ᠶᠣᠰᠣ ᠪᠠᠷ ᠬᠤᠪᠢᠷᠠᠭᠤᠯᠬᠤ ᠶᠣᠰᠣᠲᠠᠢ ᠶᠢ ᠺᠣᠳ᠋ ᠠᠴᠠ ᠳᠡᠭᠡᠷ᠎ᠡ ᠨᠢᠭᠡ ᠳᠠᠪᠬᠤᠷᠭ᠎ᠠ ᠶᠢᠨ ᠣᠷᠣᠨ ᠵᠠᠢ ᠲᠤ ᠦᠯᠡᠳᠡᠭᠡᠵᠦ ᠥᠭᠪᠡᠯ ᠪᠣᠯᠴᠢᠬᠠᠨ᠎ᠠ᠃